نشر"البلوجر السياحي" محمود رضا ، تدوينة مطولة شرح فيها خطة مصيف ب 130 جنيه فقط، الأمر الذي اعتبره متابعوه اختراق تاريخي لأسعار التصييف الأن .
كتب "رضا" يشرح ضربة البداية: لو معاك 130 جنيه .. هقولك إزاي تصيف في ماليڤ الغلابة .. هعرفك كل التفاصيل وتروح إزاى؟
في البداية هتجهز شنطتك بهدوم البحر وهتبدأ يومك بدري وأفطر كويس وخد معاك ميه متلجه وهتركب المترو وهتنزل محطة المرج الجديدة ، وبمجرد خروجك هتلاقى جنب المترو ميكروباصات فايد والفرد فيها بـ 35 جنيه هتوصلك فايد مباشرة وهتنزلك عند شارع فايد الجديد وده شارع تجاري هتلاقي فيه مطاعم والأسعار عادية فعلا فول وطعمية وكشري وسمك وسوبر ماركت ومعدات غطس المهم خلص الشارع ده لأخره هتتمشى 10 دقايق هتلاقي نفسك أول طريق البلاجات.
وأول شاطئ حكومي هيقبلك شاطئ الزهور وبعده بشوية شاطئ فايد الجديد ودخول الفرد بـ 20 جنيه والكرسي بـ 10 جنيه والشمسية والترابيزة بـ 10 جنيه كده إنت صرفت لحد دلوقتى ( 10 ج مترو + 35 إلى فايد + 20 دخول شاطئ + 10 كرسى + 10 ترابيزة وشمسية) 85 جنيه + 45 العودة إلى البيت (من فايد إلى المرج 35 + 10 مترو) ..
طبعا فيه حمامات هتقدر تغير هدومك فيها _على أدها _ وممكن تسيب شنطتك عند الأمن أو الكافتيريا وهتنزل تبلبط براحتك الشاطئ شغال من 5 ص حتي 7 م وبعد ما تخلص يومك استحمي وإلبس هدومك وشد علي القاهرة هتلاقي موقف ميكروباص المرج جنب شارع فايد الجديد وبعد ساعة وربع هتكون في المرج .
